13 të arrestuar në doganën greke të Mavromatit, Qafë Bota u bllokua për disa orë

Sipas një deklarate zyrtare nga Ministria greke e Mbrojtjes së Qytetarit, operacioni po kryhet nga Shërbimi i Punëve të Brendshme të Forcave të Sigurisë në Epir dhe ka për qëllim goditjen e një rrjeti të dyshuar për ryshfet, korrupsion dhe shkelje të detyrës nga zyrtarë doganorë.

Deri në këto momente, janë arrestuar 13 persona, ndërsa hetimet janë ende në zhvillim. Autoritetet kanë mbajtur një profil të ulët publik mbi identitetet e të arrestuarve dhe hollësitë e dosjes, për shkak të ndjeshmërisë së çështjes dhe për të mos penguar hetimet në vijim.

Ky zhvillim erdhi pas bllokimit të përkohshëm të lëvizjes në Pikën Kufitare të Qafë Botës më herët gjatë ditës, që tani është rikthyer në normalitet pasi dogana greke u rihap.

Shërbimi i Punëve të Brendshme ka paralajmëruar se së shpejti do të publikojë një përditësim të ri me më shumë detaje rreth të arrestuarve, akuzave konkrete, objekteve të sekuestruara dhe fushës së veprimit të rrjetit të dyshuar korruptiv.