Tragjedi në Gjykatën e Apelit: Gjyqtari Astrit Kalaja qëllohet për vdekje me armë zjarri

Një ngjarje e rëndë ka tronditur këtë të hënë Tiranën, ku gjyqtari i Gjykatës së Apelit, Astrit Kalaja, ka humbur jetën pasi u qëllua me armë zjarri brenda sallës së gjyqit nga 30-vjeçari Elvis Shkambi.

Sipas informacioneve të siguruara, ngjarja ndodhi gjatë një seance gjyqësore, ku autori arriti të hynte i armatosur në sallë dhe qëlloi drejt gjyqtarit, duke e plagosur rëndë në kraharor. Kalaja u transportua menjëherë në spital, por mbërriti pa shenja jete.

Gjatë të shtënave, dy persona të tjerë, babë e bir — Rakip Kurtaj, 65 vjeç, dhe Ervis Kurtaj, 45 vjeç — mbetën të plagosur. Fatmirësisht, ata janë jashtë rrezikut për jetën, me plagë të lehta në trup dhe duar.

Autori Elvis Shkambi u neutralizua dhe u arrestua menjëherë nga forcat e sigurisë, ndërsa arma e krimit u sekuestrua. Në dëshminë e tij të parë, ai ka deklaruar se “i ishte bërë padrejtësi në procesin gjyqësor”.

Ngjarja ka ngritur pikëpyetje serioze për mënyrën se si Shkambi arriti të kalonte barrierat e sigurisë dhe kontrollin me detektor metalik në ambientet e Gjykatës së Apelit.

Kush ishte gjyqtari Astrit Kalaja:

Lindur në Shkodër, ai u diplomua në vitin 1993 në Fakultetin e Drejtësisë dhe menjëherë pas studimeve nisi punën si gjyqtar në Gjykatën e Shkodrës. Prej shtatë vitesh ishte anëtar i Gjykatës së Apelit, ndërsa kishte plot 18 vite eksperiencë në sistemin e drejtësisë. Në dhjetor të vitit 2019, ai u rishpall i konfirmuar në detyrë pas procesit të Vettingut.

Hetimet për ngjarjen vijojnë, ndërsa autoritetet po punojnë për të zbardhur motivet e sakta të kësaj vrasjeje që ka tronditur opinionin publik dhe sistemin e drejtësisë në vend.