Aksident tragjik në aksin Sarandë–Delvinë, humbin jetën dy të reja

Një ngjarje e rëndë ka ndodhur mbrëmjen e sotme, më 24 gusht, në aksin rrugor Sarandë–Delvinë, ku dy vajza të reja kanë humbur jetën si pasojë e një përplasjeje të fortë mes dy automjeteve.

Sipas njoftimit zyrtar të Policisë, rreth orës 20:15, automjeti tip “Audi”, i drejtuar nga shtetasi K. N., 23 vjeç, është përplasur me automjetin tip “Lancia”, që drejtohej nga shtetasja E. Dh., 22 vjeçe.

Përplasja fatale ka rezultuar me humbjen e jetës së drejtueses së mjetit “Lancia” dhe pasagjeres së saj, R. Dh., 20 vjeçe. Një pasagjere tjetër, A. Zh., 24 vjeçe, ka mbetur e plagosur rëndë dhe aktualisht ndodhet nën kujdesin e mjekëve në spital.

Dyshohet se viktimat, E. Dh. dhe R. Dh., janë motra, duke e bërë ngjarjen edhe më tragjike.

Policia ka mbërritur në vendngjarje dhe po vijon hetimet për zbardhjen e plotë të rrethanave të aksidentit.